នាព្រឹកថ្ងៃពុធ ទី១០ ខែកញ្ញា ឆ្នាំ២០២៥ លោកជំទាវ មាន សំអាន ប្រធានគណៈកម្មការទី៨ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី៦ បានអញ្ជើញជាអធិបតីក្នុងវេទិកាការងារថ្នាក់ស្រុក ដែលប្រារព្ធធ្វើឡើងនៅវិទ្យាល័យប្រមូលព្រហ្ម ស្រុកព្រះស្តេច ខេត្តព្រៃវែង ដោយមានការអញ្ជើញចូលរួមពី ឯកឧត្តម លោកជំទាវ សមាជិកគណៈកម្មការទី៨ព្រឹទ្ធសភា សមាជិកក្រុមសមាជិកព្រឹទ្ធសភាប្រចាំភូមិភាគទី៦ អភិបាល-រងនៃគណៈអភិបាលខេត្ត លោក លោកស្រី នាយករងរដ្ឋបាលសាលាខេត្ត មេបញ្ជាការកងកម្លាំងទាំងបី ប្រធានមន្ទីរអង្គភាពជុំវិញខេត្ត ប្រធានសាខា ប.ស.ស ខេត្ត នាយកវិទ្យាស្ថានពហុបច្ចេកទេសខេត្ត នាយកមជ្ឈមណ្ឌលការងារខេត្ត និងមន្ត្រីរាជការពាក់ព័ន្ធ ព្រមទាំងបងប្អូនពលករ និងប្រជាពលរដ្ឋ សរុបប្រមាណជាង ៦៩២នាក់។

មានមតិសំណេះសំណាលក្នុងវេទិកានាពេលនោះ លោកជំទាវ មាន សំអាន បានមានប្រសាសន៍ថ្លែងនូវអំណរគុណយ៉ាងជ្រាលជ្រៅចំពោះបងប្អូនប្រជាពលរដ្ឋទាំងអស់ដែលបានចូលរួម ព្រមទាំងបាននាំយកការផ្តាំផ្ញើសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ឯកឧត្តម អ៊ុច បូររិទ្ធ អនុប្រធានទី១ និងឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា ជូនដល់អាជ្ញាធរខេត្ត-ស្រុក និងប្រជាពលរដ្ឋស្រុកព្រះស្តេច ប្រកបដោយសេចក្តីនឹករលឹក។
លោកជំទាវ បានលើកឡើងអំពីគោលបំណងសំខាន់នៃការរៀបចំវេទិកា គឺ ទី១៖ ចូលរួមអនុវត្តន៍គោលនយោបាយរបស់រាជរដ្ឋាភិបាល ក្នុងការជួយគាំទ្រពលករដែលវិលត្រឡប់ពីប្រទេសថៃ ក្នុងការទទួលបានឱកាសការងារសំដៅបង្កើនអត្រាអ្នកមានការងារធ្វើនៅតាមមូលដ្ឋាន និងចូលរួមលើកស្ទួយជីវភាពប្រជាពលរដ្ឋឱ្យកាន់តែប្រសើរឡើង ទី២៖ ផ្សព្វផ្សាយព័ត៌មានឱកាសការងារពីសំណាក់ សហគ្រាស ក្រុមហ៊ុន គ្រឹះស្ថាន ដែលមានតម្រូវការជ្រើសរើសកម្លាំងពលករ និងផ្ដល់ឱកាសដល់ពលករដែលកំពុងស្វែងរកការងារធ្វើនៅក្នុងភូមិសាស្ត្រខេត្តព្រៃវែង និងទី៣៖ ផ្តល់ឱកាសដល់គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈខេត្តព្រៃវែង ធ្វើការផ្សព្វផ្សាយពីឱកាសអាហារូបករណ៍ វគ្គអប់រំបណ្ដុះបណ្ដាលជំនាញវិជ្ជាជីវៈ និងបច្ចេកទេស ព្រមទាំងធ្វើការចុះឈ្មោះយុវជនមកពីគ្រួសារក្រីក្រ និងងាយរងហានិភ័យដែលមានបំណងចង់រៀនជំនាញវិជ្ជាជីវៈផ្ទាល់ខ្លួន។ ទន្ទឹមនឹងនោះ លោកជំទាវ បានអំពាវនាវដល់បងប្អូនពលករ និងប្រជាពលរដ្ឋ ឱ្យប្រញាប់រួសរាន់ធ្វើការចុះឈ្មោះដើម្បីឆាប់ទទួលបានការងារធ្វើ និងសូមកុំធ្វើចំណាកស្រុកដោយប្រថុយប្រថានក្នុងការលួចឆ្លងដែនចូលទៅធ្វើការនៅក្រៅប្រទេសដោយខុសច្បាប់។

គិតមកដល់ថ្ងៃទី៩ ខែកញ្ញា ឆ្នាំ២០២៥ ខេត្តព្រៃវែងមានបងប្អូនពលករវិលត្រលប់មកពីប្រទេសថៃ សរុបចំនួន ២១,៤៣៥នាក់ អ្នកទទួលបានការងារធ្វើចំនួន ១៥,៨០៣នាក់ និងអ្នកមិនទាន់មានការងារធ្វើចំនួន ៥,៦៣២នាក់។

ប្រភព៖ ការិយាល័យជំនួយការគណៈកម្មការទី៨ព្រឹទ្ធសភា